Mayorya sang mga Pilipino ang nagapabor nga mag-atubang si Vice President Sara Duterte sa Senado ukon impeachment court agud sabton ang mga kaso batok sa iya kag pamatud-an nga wala siya sang sala.
Base sa resulta sang Tugon ng Masa (TNM) survey sang OCTA Research, 78% sang mga Pilipino ang luyag nga mag-atubang si VP Sara sa impeachment court.
Ginpahayag sang OCTA nga ang survey ang may margin of error nga ±3% sa 95% nga confidence level.
Suno pa sa OCTA, ang subnational estimates para sa mga lugar nga sakop sang survey ang may margins of error sa 95% confidence level: ±6% para sa Metro Manila, Balance Luzon, Visayas, kag Mindanao.
Sang Pebrero 5, ginpasar sang House of Representatives ang impeachment batok kay Duterte, nga gin-aprobahan sang kapin 200 ka mga kongresista.
Sa amo man nga adlaw, ginpadala sa Senado ang Articles of Impeachment, apang wala ini natandog gilayon bangud nag-adjourn ang Senado.
Sang Pebrero 25, ginpahayag ni Senate President Francis “Chiz” Escudero nga magasugod ang proseso sang impeachment trial sang Hunyo 2.
Apang sang Mayo 29, gin-anunsyo ni Escudero ang pagpresentar sang impeachment articles sa Hunyo 11 agud unahon anay ang mga prayoridad sang administrasyon antes matapos ang ika-19 nga Kongreso.
Ginsiling naman ni Senador Ronald “Bato” dela Rosa nga siya kag iban nga mga senador nagapreparar sang resolution nga nagapanawagan nga untaton ang impeachment case batok kay Duterte.
Ginpasakaan si Duterte sang mga reklamo nga naangot sa paglapas sa pagsalig sang publiko, paglapas sa Konstitusyon, pagkumiter sang korapsyon, kag iban pa nga seryoso nga krimen.
