ILOILO CITY – Naggamay ang kadamuon sang salakyan sa syudad sang Iloilo kadungan sang All Saints Day subong nga adlaw.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga nagpugok ang dalagan sang trapiko kahapon sang hapon tubtub magkasisidmon.
Partikular nga gintumod ni Conlu amo ang dalan sa palibot sang Mandurriao Catholic Cemetery kag amo man sa palibot sang pribado nga patyo sa nasambit nga distrito.
Suno kay Conlu, lakip sa mga rason sang traffic congestion amo ang pagbubo sang ulan kag ang natabo nga pagbunggu-anay sang salakyan sa sulod sang pribado nga patyo apang gilayon man ini nga nasolusyunan.
Ginpahayag ni Conlu nga paglampas sang 7:00 kagab-i, gilayon man nga nangin light to moderate ang dalagan sang trapiko.
Magluwas sa salakyan, naggamay man suno sa natungdan ang nakumpiska nga mga gamit kasubong sang hinganiban kun ipaanggid sang nakaligad nga tuig.
Samtang, ‘manageable’ ang dalagan sang trapiko sa distrito sang Mandurriao kadungan sang All Saints Day subong nga adlaw.
Sa interview sang Bombo Radyo kay Police Major Marlon Valencia, hepe sang Mandurriao Police Station, iya ginpahayag nga nagpugok ang dalagan sang trapiko ilabi na sa ginsang-an sang dalan sa Calajunan kag ang padulong sa distrito sang Arevalo.
Suno Valencia, isa sa mga rason sang pagpugok sang trapiko amo nga one-way lang ang alagyan pasulod sa isa pribado nga patyo sa Mandurriao rason nga gilayon nga ginpahamtangan sang traffic enforcer sa area.
Ginpahayag ni Valencia nga kun tuhoy naman sa peace and order, wala sang may natabo nga mga krimen may kaangtanan sa pagsaulog sang tigkalalag.
