ILOILO CITY – Nagalibot na sa syudad sang Iloilo ang KADIWA ni ANI at KITA agud nga magbaligya sang mga utan ukon iban pa nga mga produkto.
Una diri nga manugbaligya sa Arevalo Plaza amo si Solmmy Ojario, ang marketing supervisor sang Hybrid Rice Feeds sang Department of Agriculture 6.
Sa interview sang Bombo Radyo kay Ojario, iya ginpahayag nga luyag niya nga ang mga produkto sa kabanwahanan sa probinsya sang Iloilo ang madala man sa syudad.
Suno kay Ojario, nagabuylog gid siya sa programa sang Department of Agriculture agud nga masolusyonan ang krisis sa pagkaon.
Apang indi man niya mapunggan nga ipa-utwas ang iya nabatyagan sa pila ka mga banwa sa probinsya nga apisar produkto agricultura ang ila nga dal-on sa syudad, indi pa ang mga ini pagpasudlon ukon palabayon.
Pahayag niya, maathag man sa memorandum sang Department of the Interior and Local Government kag ni Iloilo Governor Arthur Defensor Jr. nga ang mga delivery sang produkto ang ginapahanugutan nga makasulod kag makaguwa sa probinsya sang Iloilo.
Nahibaluan nga kada Martes, yara sa Iloilo Terminal Market kag Arevalo Plaza ang KADIWA ni ANI at Kita; sa Molo Plaza kag Iloilo Terminal Market kun Huwebes; Lapaz kag Mandurriao Palaza kun adlaw naman sang Sabado humalin 7:00 sa aga tubtob 10:00 sa aga.
Pahanumdom sa tanan nga manugbakal, kinahanglan nga naka mask, magdala sang eco bag kag mag observe sang physical distancing.
