Gin-anunsyo sang Presidential Communications Office (PCO) nga nagabaligya ang Department of Agriculture (DA) sang bugas sa presyo nga P29 per kilo sa lima ka Kadiwa stores sa Metro Manila.
Ini amo ang Kadiwa stores sa ADC Building sang Department of Agriculture – Central Office sa Quezon City; Kadiwa Center sa sulod sang Bureau of Plant Industry sa Malate, Manila; Kadiwa Store sa Llano Road sa Barangay 167, Caloocan City; Kadiwa Store sa AMVA Housing, La Mesa Street sa Barangay Ugong, Valenzuela City; kag Kadiwa Center sa PhilFIDA Compound, Talon Dos, Las Piñas City.
Ginpahayag sang DA nga kada puluy-an ang mahimo makabakal sang maximun nga lima ka kilo sang bugas depende sa available sa store.
Available man sa balaligyaan ang isda, itlog, bombay, ahos, ulutanon kag mga prutas.
Suno pa sa ahensya, magapadayon ang pagbaligya sang bugas sa presyo nga P29/kilo bangud ginapanan-aw sang gobyerno nga maka-produce sang masobra 100-million kilos sang bugas sa Agusto paagi sa contract farming agreement sa Farmers’ Cooperatives Associations.
Ang Kadiwa Program amo ang flagship program sang Marcos Administration nga nagapahanugot sa local farmers nga direkta nga magbaligya sang ila mga produkto sa mga consumers. Tuyo sini nga mabuligan ang local farmers nga maka-income kag makahatag man sang barato nga mga produkto sa mga consumers.#
