Iduso ni Iloilo City Councilor Ely Estante ang pag-amyendar sang Iloilo City Regulation Ordinance 2011-307 ukon ang ginatawag nga CCTV Ordinance.
Sa interview sang Bombo Radyo Iloilo kay Councilor Estante nga amo ang author sang ordinansa, iya ginpahayag nga may yara sang bag-uhon kag idugang sa ordinansa agud mas mangin epektibo kag mapuslanon ini.
Suno kay Estante, nagakadapat nga multahan ang mga establisiemento nga may yara sang CCTV camera apang wala nagafunction.
Ginpahayag man ni Estante nga dapat man nga idugang sa ordinansa nga may yara sang 24/7 nga monitoring sa CCTV kag dapat nga may yara sang assigned nga tawo nga tungdan ini nga trabaho sa tagsa ka establisiemento.
Ini nga tikang sang konsehal ang kasunod sang natabo nga pagmaoy sang tatlo ka pulis sa isa ka disco bar and restaurant sa Syudad sang Iloilo apang ginbudlayan ang mga otoridad sa ila imbestigasyon bangud wala nakuhaan sang footage ang insidente bangud gubaon ang CCTV camera sa nasambit nga establisiemento.
Nahibaluan nga ang nasambit nga ordinansa ang nagasakop sang mga bangko kag ang ila satellite offices, branches kag automated teller machines (ATMs), money changers, pawnshops, kag iban nga credit, lending kag financial institutions; hotels, malls, supermarkets; fuel, petrol ukon gas stations; transport terminals; convenience stores nga naga operate sang 24 oras ukon naga-operate kun gab-i; private schools; nga stores nga nagabaligya ilimnon lakip na apang indi limitado sa disco houses ukon clubs; mga lugar kun sa diin nahamtang ang critical assets ukon propedad sang City Government.
