Arestado ang tatlo ka mga indibidwal lakip ang anay pulis kag incumbent barangay kagawad sa ginpatigayon nga drug buy bust sa Brgy. Licu-an, Dingle, Iloilo, Pebrero 15.
Ang nagkaladakpan amo sanday Alyas Ed, 51, anay myembro sang Philippine National Police; Alyas Kor, 55, number 1 nga incumbent nga kagawad sang nasambit nga lugar; kag Alyas Jr, isa ka Street Level Individual (SLI).
Nagdangat sa 310 gramos ang kabug-usan nga nakumpiska nga ginapasuni nga shabu nga may standard drug price nga P2,108,000.
Ang amo nga operasyon ang ginpangunahan sang Provincial Drug Enforcement Unit (PDEU).
Nahunong ang mga arestado sa Dingle Municipal Police Station kag natalana nga mag-atubang sa panumbungon nga paglapas sa Republic Act 9165 ukon Comprehensive Dangerous Drugs Act of 2002.#
