Ginpanawagan ni Punong Barangay Fredo Avanceña ang pagsungka sang iya kagawad nga nakabuno-patay sa manug-deliver sang tubig pasado ‘las 2 kahapon nga adlaw, Mayo 7, sa Brgy. Sta. Filomena, Arevalo, Iloilo City.
Ang biktima amo si John Robert Sayno, 28-anyos, kag residente sang Sto Domingo, Arevalo.
Ang suspek naman amo sanday Kagawad Melvin Acebuque, residente sang Sta. Felomina, Arevalo; kag Mark Anthony Bañares, residente sanc Brgy. Bonifacio, Arevalo.
Sa interview sang Bombo Radyo kay Punong Barangay Avanceña, iya ginpahayag nga antes pa man mangin kagawad si Acebuque, nagapautang na ini kaupod sang biktima rason nga ginkakibot sini ang natabo.
Nagapati man ang natungdan nga may yara sang mas madalom nga rason ang natabo nga insidente sa tunga sang suspek kag biktima.
Posible naman suno sa iya nga bangud madamo sang abyan ang suspek, wala na ini sa ila nga barangay subong kasunod sang insidente.
Nahibaluan nga si Kagawad Acebuque amo man ang nagakapot sang Committee on Peace and Order bangud masami ini nga nagalibot sa ila barangay gamit ang motorsiklo kag sa subong yari naman ini sa iya nga ikatatlo nga termino.
Dugang pa sang punong barangay, wala man sang malain nga rekord ang kagawad sa ila nga lugar kag aktibo man sa iya nga katungdanan.
Sa bahin sang biktima, wala man ini sang malain nga record sa ila nga barangay.
Una na nga ginpahayag sang Arevalo Police Station nga antes ang stabbing incident, may baisay anay nga natabo bangud sang alegasyon sang kinawatay.
Nahibaluan man nga may daan na nga hiligut-anon ang mga ini kag nakaagi man trabaho ang biktima sa suspek sa sulod sang anom ka tuig.
Matapos ang insidente, gilayon nga nagpalagyo sakay sang motorsiklo si Acebuque kag Bañares. Nagapadayon naman ang hot pursuit operation sang kapulisan batok sa mga suspek.#
