𝗠𝗢𝗟𝗢, 𝗜𝗟𝗢𝗜𝗟𝗢 𝗖𝗜𝗧𝗬 — Gin-ako sang isa ka opisyal sang Barangay San Pedro, Molo, Iloilo City nga naglain ang iya buot sang ginsinggitan ini sang isa ka pulis samtang nagapatigayon sang clearing operation ang Iloilo City Traffic Management Unit (ICTMU) kahapon nga adlaw.
Sa interview sang Bombo Radyo kay Kagawad Rhomar Martirez sang Brgy. San Pedro, Molo, Iloilo City, iya ginpahayag nga sa amo nga adlaw, gintawgan siya sang iya nga pumuluyo agud nga magpangayo sang bulig bangud may clearing operation sa tubang sang ila nga barangay hall.
Suno kay Martirez, gilayon siya nga nagpadulong sa lugar, apang bangud sa tuman ka dali, wala sini nasuksok ang iya helmet, rason nga ginsita ini sang pulis nga naka-standby samtang ginapatuman ang clearing operation kag nagsiling “Helmet mo! Kagawad ka wala ka naga-helmet?”.
Nagsabat naman si Martirez sa pulis nga kun may bayolasyon siya, indi lang siya paghambalan sang masakit nga mabatian sang kadam-an ilabi na nga isa siya ka barangay opisyal.
Ginpahayag man sang natungdan nga gilayon siya nagpakig-angot kay Police Lieutenant Colonel Lorenez Losaria, Deputy City Director for Operations sang Iloilo City Police Office (ICPO) kaangot sa akto nga gin-ubra sang pulis, sa diin, nagpasalig naman ini nga gilayon ipatawag ang amo nga pulis.
Ginkakibot naman ni Martirez ang pagpangakig sa iya ni Ret. Police Colonel Udarico Garbanzos nga pinuno sang ICTMU bangud sa tikang nga nagpanugid siya kay Lt. Col. Losaria kaangot sa pagsita sang pulis.
Ini nangin rason man agud isukma ni Martirez ang pagpangayo sang mga tinawo ni Garbanzos sang P300 nga pamahaw halin sa mga pumuluyo sang Brgy. San Pedro, Molo.
Nagpadulong naman si Martirez subong nga adlaw sa opisina ni Iloilo City Mayor Jerry Treñas agud nga ipaathag ang natabo, sa diin, nagpasalig man ang alkalde nga himuan sang affidavit agud nga maleksyonan ang pulis nga nagsinggit sa iya.
Gin-athag man ni Martirez nga sa iya nga pagpadulong sa talatapan ni Ret. Police Colonel Garbanzos, tahap siya nga gin-abi-abi, sa diin, nagpangayo pa sang pasensya sa iya ang pinuno sang ICTMU.
