Nagdangat sa malapit P1.4 billion ang balor sang damage sa agrikultura bangud sang bagyo Agaton.
Sa ginpaggwa nga bulletin sang Department of Agriculture (DA), ang nasambit nga bagyo ang nag-apekto sa 23,188 nga mga mangunguma kag manugpangisda samtang nagdangat sa 35,258 metric tons ang volume sang production loss kag 17,384 ka ektarya sang agricultural areas sa Western Visayas, Eastern Visayas, Zamboanga Peninsula, Soccsksargen kag Caraga ang naapektuhan.
Ang fisheries amo ang labing naapektuhan nga may total nga P763.3 million nga value loss kag 2,234 nga manugpangisda ang apektado.
Nagdangat naman sa 33,501 MT ang volume loss sa palay kag 16,752 ka ektarya sang lupa nga nagabalor sang P595.6 million ang apektado.
Sa high value crops, P30 million nga may volume loss nga 866 MT kag 215 nga ektarya sang lupa ang naguba.
Sa mais, nagdangat sa P21.4 million ang kapyerdehan kun sa diin, ang volume loss ang naglab-ot sa 891 MT kag 417 ka ektarya sang lupa ang na-wipe out.
Ang damage naman sa livestock kag poultry ang nagdangat sa P7.2 million kun sa diin, 12,771 ka ulo sang manok, baboy, carabao, pato kag kanding ang nagkalamatay.
Suno sa DA, nagapatigayon na sila sang assessment sang guba kag kapyerdehan nga tuga sang bagyo sa agri-fisheries sector pinaagi sa mga regional field offices.
Nagapadayon man ang pagpakig-angot sa concerned national government agencies, local government units kag iban pa nga disaster reduction kag management-related offices sa epekto sang tropical depression kag subong man sa available nga resources nga gamiton para sa intervention kag assistance.
Suno sa ahensya, yari ang mga assistance nga ihatag sa mga apektado nga mangunguma kag manugpangisda:
- P500 million nga balor sang Quick Response Fund (QRF) sa rehabilitation sang mga apektado nga lugar,
- P100 million sa idalom sang Survival and Recovery (SURE) Assistance Program sang Agricultural Credit Policy Council (ACPC) para sa Western Visayas,
- P42.07 million nga rice seeds, P16.76 million nga corn seeds kag P3.61 million sa nanari-sari nga utan,
- P40,000 nga balor sang animal stocks, bulong sang livestock kag poultry halin sa Regional Field Office 13,
kag available nga pondo nagikan sa Philippine Crop Insurance Corporation (PCIC) agud nga ibayad sa mga apektado nga mangunguma.
