ILOILO – Ginpresentar ni Iloilo Police Provincial Office Director Police Col. Marlon Tayaba ang sitwasyon sang peace and order sa probinsya sang Iloilo sa ginpatigayon nga session sa Sanguniang Panlalawigan.
Sa session, ginpahayag ni Tayaba nga ang physicial injury, theft, rape, robbery, murder, homicide kag motornapping ang nagapanguna nga krimen sa probinsya sang Iloilo.
Suno kay Tayaba, nagtaas ang total crime volume nga ginalakipan sang index crime kag non-index crime.
Ang index crime suno kay Tayaba amo ang crimes against human and properties samtang ang halimbawa sang non-index crime amo ang traffic accident.
Santo sa data, ang physicial injury humalin sang Enero tubtub Hulyo 2019 ang nagalab-ot sa 254, theft nga may 91, rape nga may 88, roberry nga may 75, murder nga may 52, homicide nga may 23 kag motornapping nga may 26.
Sa non-index crime naman, nagapanguna ang traffic accidents sa diin kalabanan sa mga biktima ang nagasakay sa motorsiklo.
Nagpaathag naman si Tayaba kun nga-a wala nalakip sa total crime volume ang tuhoy sa illegal gambling.
Suno sa natungdan, may yara siya sang separado nga data kun illegal gambling ang pagahambalan apang wala niya ginlakip sa pagpresentar bangud nga iya lang nga ginbasehan ang request sang Sanguniang Panlalawigan.
Ginpahayag man ni Tayaba nga bangud wala sang carnapping sa probinsya sang Iloilo, ila na lang ini nga dulaon sa 8 focus crimes kag paga-ilisan na lang sang illegal fishing.
