Magapatigayon sang isa ka hublag-protesta sa syudad sang Iloilo sa Pebrero 25 adlaw sang Mierkules kadungan sang ika-40 nga anibersaryo sang EDSA People Power Revolution.
Pagapangunahan ini sang Kahublagan Kontra Kurapsyon (KKK) nga amo ang isa sa multi-sectoral alliance sang mga Ilonggo kontra kurapsyon.
Sa interview sang Bombo Radyo kay Elmor Forro, spokesperson sang BAYAN, iya ginpahayag nga pagapamunuan sang simbahan ang isa ka prayer march kag assembly kun sa diin magasugod ini sa Iloilo Provincial Capitol sa takna nga 12:30 sa udto.
Pag-abot sa takna nga 2:30 sa hapon magamartsa ang protesters pakadto sa St. Clement’s Church, kag magadiretso sa Jaro Plaza.
Magahiwat man sang programa agud talakayon ang ika-40 nga anibersaryo sang EDSA People Power Revolution kag ang kahimtangan sang pungsod sa karon nga tion.
Suno kay Forro, bitbit sang mga partisipante ang mga panawagan nga “balikan ang kasaysayan” kag “ipabalik ang ginkuha sang mga nangawat sa gobyerno.”
Lakip man sa ila mga panawagan ang pagsukot sa mga lider nga ginatudlo may responsibilidad sa mga isyu sang pungsod, lakip na ang pamilya Marcos kag Duterte.
Nagapanawagan man ang grupo sang paghugpong sang nagkalain-lain nga sektor sang komunidad agud matagaan sang hustisya ang pungsod batok sa mga nagpamintaha halin sa pinakamanubo nga posisyon tubtob sa may pinakamataas nga katungdanan sa gobyerno.
