Ginahitso na ang pagbalik ni Filipino basketball player Kai Sotto sa Estados Unidos bangud ginkansela na ang final window sang 2021 FIBA Asia Cup qualifiers.
Nagalaum ang kampo ni Sotto nga makaupod sa gihapon ini sa Team Ignite sa diin nag-umpisa na ang NBA G-League campaign.
Suno kay Samahang Basketbol ng Pilipinas (SBP) director for operations Butch Antonio, nakaguwa na sa bubble ang nasambit nga basketball player kag padayunon na lang sini ang iya quarantine sa iya ginatiniran.
Nahibaluan nga nag-abot si Sotto sa Pilipinas sang Pebrero 2 agud nga mag-upod sa Gilas Pilipinas training sa Calamba City, Laguna.
Ang Gilas ang nagahanda kuntani sa final window sang FIBA Asia Cup qualifiers nga patigayunon sa Doha subong nga bulan apang bangud sa nagataas nga kaso sang COVID-19 , ginkansela ang hampang.
Ginpasalamatan naman ni Antonio si Sotto bangud handa ini nga buligan ang Gilas sa pagrepresenta sang Pilipinas.
