Dismayado ang Pinoy fans matapos nga wala nakaupod si Kai Sotto sa una nga hampang sang Orlando Magic sa National Basketball Association (NBA) Summer League sa Las Vegas, Nevada, USA.
Na-rehistro si Sotto bilang DNP (Did Not Play – Coach’s Decision) sa hampang kun sa diin nalutos man ang Magic sa Detroit Pistons, 89-78.
Nanguna sa Pistons si James Wiseman, ang ikaduha nga overall pick sa 2020 NBA Draft, nga may 16 points, 11 rebounds, kag two blocks; kag yara man si Jalen Durent, ang 13th overall pick sa draft sang nagligad nga tuig nga may 17 points kag eight rebounds.
Nanguna naman sa Magic si Kevon Harris nga may 21 points kag si Anthony Black nga may 17 points, five rebounds, kag five assists.
Ang sunod nga tyansa ni Sotto amo ang hampang sang Magic batok sa Indiana Pacers kun sa diin yara ang iya former Adelaide 36ers teammate nga si Mojave King.
Balantayan ang hampang Lunes sang gab-i sa Las Vegas samtang 8:30 sa Martes sang aga oras diri sa Pilipinas.
Pagkatapos atubang sa Pacers, may tatlo pa ka hampang ang Magic sa Summer League lakip na ang game batok sa New York Knicks sa July 13, pagasundan sang Portland Trail Blazers sa July 14, kag may isa pa atubangon nga team sa wala pa natumod nga petsa. #
