ILOILO CITY – Nagapati ang Katilingban sang Imol sa Syudad (KAISOG) nga ang ginapahayag natabo nga pagpamahog sa organizer sang organisasyonang isa ka sahi sang pagpang-atake sa ila nga grupo.
Ini ang kasunod sang pagpadulong sang nagpakilala nga sanday Art Diaz, agent sang National Bureau of Investigation (NBI) kag Rey Gomez, agent sang Philippine Army, sa balay ni KAISOG organizer Wilfredo Panuela sa Brgy. Bitoon, Jaro, Iloilo City.
Sa interview sang Bombo Radyo kay Vivian Asong, chairman sang KAISOG, iya ginpahayag nga nagtuga sang kakugmat sa mga myembro sang ila nga grupo ang nasambit nga insidente.
Suno kay Asong, ang natabo ang tikang ni Presidente Rodrigo Duterte nga pagpang-atake sa mga grupo sa pungsod sa diin ginasunod man sang mga militar kag kapulisan.
Dugang pa sang natungdan, kuntani tindugan sang mga militar kag pulis ang ila nga ginsumpa nga serbehan kag proteksyonan ang mga pumuluyo.
Apang ang ginapakita pa sa subong sang mga otoridad amo ang paglapas sa layi kag kinamatarong sang katawhan.
Sa subong, magahiwat sang pasinapol ang organisasyon agud nga ma-istoryahan ang ila masunod nga mangin tikang sa pagsolbar sang natabo kay Panuela.
