ILOILO CITY- Madamo ang nagakinahanglan sang dugo adlaw-adlaw rason nga kinahanglan nga bastante man ang suplay sang dugo.
Sa interview sang Bombo Radyo kay Romarie Sanchez, blood donor recruitment officer sang Philippine Red Cross, iya ginpahayag nga kalabanan sa nagakinahanglan sang dugo amo ang mga dialysis patients, mga cancer patients, kag mga biktima sang aksidente sa diin tubtob sa 14 ka bags nga dugo ang kinahanglan sang isa lang ka pasyente.
Suno kay Sanchez, bastante pa sa karon ang suplay sang dugo apang indi mapaktan kun kutob san-o sini masarangan nga magsustiner.
Ginpahayag ni Sanchez nga ini ang rason kun ngaa padayon sila nga nagakampanya agud madugangan pa gid ang suplay sang dugo bangud madamo pa sa gihapon ang wala maka-realisar sang importansiya sang blood donation.
Suno pa kay Sanchez, isa ang Dugong Bombo nga maayo nga pamaagi agud maangkon ang bastante nga suplay sang dugo.
Gindugang sang natungdan nga wala sang dapat kahadlukan sa pagdonar sang dugo kag dapat nga mas mangibabaw ang pagkabaganihan sa nabatyagan nga katalaw.
Dapat man mahangpan sang publiko nga ang pagdonar sang dugo indi lang makasugpon sang kabuhi sang makabaton bangud may benepisyo man ini sa ikaayong lawas sang blood donor.
Gina-agda ni Sanchez ang tanan nga mangin kabahin sang Dugong Bombo 2019 sa Nobyembre 16,sa Iloilo Science and Technology University, sa Burgos St., Lapaz, Iloilo City kag mangin instrumento agud masugpunan ang kabuhi sang iban.
