ILOILO CITY – Magapasaka sang kaso ang Katilingban sang Imol sa Syudad (KAISOG) batok sa duha ka mga lalaki nga nag-harrass sa isa ka katapo sang grupo sa Brgy. Bito-on, Jaro, Iloilo City sang damlag lang.
Ini ang kasunod sang ginpatigayon nga pagsinapol nga gintambungan sang mga tiglawas sang Iloilo City Government, KAISOG, Philippine Army kag National Bureau of Investigation (NBI).
Sa interview sang Bombo Radyo kay Vivian Asong, chairman sang KAISOG sa syudad sang Iloilo, iya ginpahayag nga nakilala na ang matuod nga pangalan sang isa sa mga lalaki nga nag-harrass sa mag-asawa nga sanday Wilfredo kag Josephine Panuela sang nasambit nga lugar.
Suno kay Asong, ang nagpakilala nga si Rey Gomez nga agent sang Philippine Army ang nagahingalan nga si Jerryl Gobuyan sang Brgy. Cabugao, Norte, Pavia, Iloilo kag ginapahayag Intelligence Officer sang 3rd Infantry Batallion sang Philippine Army.
Ginpanginwala naman sang Philippine Army nga konektado sa ila hanay si Gobuyan.
Gintawag naman ni Asong nga wala sang kathagan ang ginpatigayon nga pagsinapol.
Nahibalu-an nga una na nga nagreklamo ang mag-asawa nga Panuela matapos nga gin-harass sang nagpakilala nga sanday Rey Gomez, agent sang Philippine Army kag Art Diaz nga agent sang Natonal Bureau of Investigation (NBI).
