ILOILO CITY – Ang kakulang sa koordinasyon sa tunga sang mga ahensya sa gobyerno ang ginatan-aw nga rason sang mga Overseas Filipino Workers nga taga probinsya sang Guimaras kun nga-a kasubong nga daw ginpasa-pasahan sila.
Sa exclusive interview sang Bombo Radyo kay alyas Nene sang Buenavista, Guimaras, isa sa repatriated Overseas Filipino Workers nga nakasakay sa barko, iya ginpahayag nga una sila nga gindul-ong sa isa ka lodge apang ginbalibaran sila bangud nga wala sang proper coordination.
Bangud sini, gindul-ong naman sila sa isa ka hotel apang liwat naman sila nga ginbalibaran bangud sa kasubong man nga rason.
Ginpahayag ni Nene nga anum sila nga taga Buenavista, Guimaras kag lunsay stress matapos ang pila ka bulan nga pagka stranded sa Metro Manila.
Gin-athag ni Nene nga wala sila nagapili sang quarantine facility kundi ang ila lamang amo nga may yara sila sang mantiniran pag-abot diri sa Iloilo agud nga makapahuway.
May kaangtanan diri, ginpahayag naman ni Buenavista, Guimaras Mayor Eugene Reyes nga ang Guimaras Provincial Government ang in-charge kun koordinasyon sa Inter-Agency Task Force ang pagahambalan.
Ginpahayag ni Reyes nga indi mahimo nga pangunahan sang Local Government Unit sang Buenavista ang Guimaras Provincial Government apang kun kinahanglan, handa siya nga maghatag sang bulig sa mga Overseas Filipino Workers paagi sa paghatag sang quarantine facility kag pagpatigayon sang Reverse Transcription Polymerase Chain Reaction (RT-PCR) test.
May kaangtanan diri, (as of 8:00 pm) 17 ka Overseas Filipino Workers ang gindala sa isa ka lodge sa distrito sang La Paz.
