ILOILO CITY – Yara pa lang sa adjustment period ang Pilipinas kun modernization program sa sektor sang Agrikultura ang pagahambalan.
Ini ang pahayag ni Capiz Vice Gov. James Magbanua nga nagaserbe nga National President sang Grain Retailers Confederation of the Philippines (GRECON) sa sitwasyon sang mga mangunguma may kaangtanan sa epekto sang Rice Tariffication Law.
Sa interview sang Bombo Radyo kay Magbanua, iya ginpahayag nga indi mahinago nga may yara sang negatibo nga epekto sa mga mangunguma ang pag-import sang bugas nga wala sang limitasyon.
Suno kay Magbanua, sa baylo nga tutukan ang rice importation bangud sa barato nga production cost, mas makapaayo nga tun-an sang gobyerno kun paano mapanubo ang production cost sa pungsod, paano masabat ang rice demand kag kun paano mapamoderno ang teknolohiya nga ipanghatag sa mga mangunguma.
Ginpahayag ni Magbanua nga may mga tekonolohiya kag pagbag-o naman nga nabulig ang Rice Tariffication Law apang kulang pa ini sa gihapon kun sa diin indi lang ang mga mangunguma ang dapat nga hatagan sang pagtamod kundi lakip na diri ang production kag marketing sang humay.
Sa subong suno sa natungdan, ang National Food Authority lamang ang ahensya sang gobyerno nga amo ang nagabakal sang local rice sa mas mataas nga presyo rason nga ang iban sa mga mangunguma ang napilitan nga magbaligya sa mas barato nga presyo bangud sa kakulang sang drying facilities.
