ILOILO CITY – Ang kakulang sa barangay ordinance ang isa sa mga rason kun nga-a failure sa Oplan Hawan ang iban nga barangay sa syudad sang Iloilo.
Ini ang pahayag ni Fernando Jose ‘Boyet’ Rico, Executive Assistant for Barangay Affairs, kun Oplan Hawan ang pagahambalan.
Sa interview sang Bombo Radyo kay Rico, iya ginpahayag nga nagbuhin na gid man ang mga sablag sa dalan apang makatingalahan kun nga-a wala sa gihapon nakapasar sa validation ang pila ka mga barangay.
Suno kay Rico, isa sa mahimo rason amo nga wala sang may napasar nga barangay ordinance agud nga mapabilin nga mahawan ang barangay roads.
Ginpahayag ni Rico nga kun nabudlayan ang mga barangay official nga magdihon sang ordinansa, mahimo man sila nga makapangayo sang bulig sa Department of Interior and Local Government ukon sa Liga ng mga Barangay.
