Ginakabig sang Institute of Contemporary Economics (ICE) nga isa sa mga daku nga problema sa power supply situation sa Visayas ang kakulang sang koordinasyon kag alignment sa tunga sang mga power generator, transmission operator, distribution utilities kag mga ahensya sang gobyerno.
Sa interview sang Bombo Radyo kay Mr. Bonnie Ladrido, Executive Director sang ICE, iya ginpahayag nga may tagsa-tagsa nga plano ang nagkalain-lain nga sektor sang energy industry, apang indi ini pirme nagatugma sa isa kag isa.
Pahayag niya, kinahanglan mas mangin hands-on ang Department of Energy (DOE) sa overall planning sang energy system, halin sa generation, transmission tubtob sa distribution.
Pagpaathag ni Ladrido, kun may yara sang mas maayo nga coordination kag alignment ang mga sector, malikawan ang mga investment nga mahimo mangin underutilized kag masiguro nga ang power supply makaabot sa mga consumers sa nagakaigo nga kadakuon kag presyo.
Ginpahayag man niya nga ang mga subsidy kag incentives para sa mga kompanya nga nagapartisipar sa Interruptible Load Program mahimo lamang nga mangin temporaryo nga solusyon, apang indi ini dapat magpawala sang focus sa mas daku nga problema sang imbalance sa supply kag demand.
Dugang pa niya, kinahanglan gihapon tutukan ang long-term solution sa power supply kag indi magsalig lamang sa mga temporaryo nga tikang.
