ILOILO CITY – Nagpanawagan ang Department of Energy sa National Grid Corp of the Philippines nga padasigon na ang pagtapos sang ongoing projects kag maintenance activities agud nga malikawan ang mga brownout subong nga summer season.
Sang Lunes, ginpa-idalom sa red alert ang Luzon grid.
Base sa inisyal nga imbestigasyon, ang power interruption ang natabo bangud sa pag-trip off sang Masinloc-Bolo 230kV transmission line sang National Grid Corp of the Philippines suno sa Department of Energy.
Suno kay Energy Secretary Raphael Lotilla, ang power outages sa Panay kag Negros sang nagligad nga semana ang bangud man sa kakulangan sa transmission system.
Ginmanduan man sang Department of Energy ang National Grid Corp of the Philippines nga i-address na ang protection coordination sang generation, transmission kag distribution systems kag padasigon ang ancillary services.
Nagpaandan naman ang Department of Energy nga may yara sang ginalauman nga yellow alerts sa bulan sang Mayo kag sa mga masunod nga mga binulan.
Ginpahayag dugang ni Lotilla nga natapos na sang Energy Regulatory Commission sa performance evaluation sang National Grid Corp of the Philippines apang wala pa sang detalye.
Nakadepende naman sa Kongreso suno kay Lotilla kun tion na agud nga ibalik sa gobyerno ang pagkontrol sang transmission system nagikan sa private-led nga National Grid Corp of the Philippines.
