ILOILO CITY – Siraduhon ang kalabanan sa mga mayor nga dalan sa syudad sang Iloilo may kaangtanan sa Opening Salvo sang Dinagyang Festival 2020.
Umpisa 1:00 buwas sa hapon, lakip sa mga siraduhon amo ang dalan General Luna, Delgado, Ledesma, J. De Leon, Aldeguer, Mapa, Guanco, Ortiz, Iznart, JM Basa, Fermin Caram, Valeria, Quezon, Montinola, Solis, Yulo, Arroyo, Arsenal, Aduana, Huervas, Dela Rama, Muelle Loney kag Rizal.
Sa interview sang Bombo Radyo kay Raymund Queque, miyembro sang Iloilo Festivals Foundation Incorporated kag in-charge sang Opening Salvo, iya ginpahayag nga ang parade route amo ang New Freedom Grandstand sa Muelle Loney St., liko sa Aduana St., liko sa tuo sa JM Basa St. tubtub sa F. Caram Avenue, liko sa wala Solis St., liko sa wala sa Valeria St., liko sa wala sa De Leon St., liko sa tuo sa Iznart St., liko sa wala sa Rizal/Ma. Clara St., liko sa wala sa Mapa St., liko sa tuo sa JM Basa St., liko sa Dela Rama St. tubtub sa final disposal area.
Suno kay Queque, 1:00 sa hapon, siraduhon na ang dalan sa City Proper kag magasugod gilayon ang programa paagi sa invocation ni Fr. Raymond Alcayaga, kura paroko sang San Jose Placer Parish Church, pagasundan sang paghatag sang mensahe ni Iloilo Festivals Foundation Inc. President Atty. Joebert Peñaflorida, Iloilo City Mayor Jerry Treñas kag Iloilo City Lone District Rep. Jam-Jam Baronda kag pagasundan sang opisyal nga deklarasyon sa pag-umpisa sang Dinagyang Festival.
Ginpahayag ni Queque nga pagkatapos sang mensahe, ipakilala sa publiko ang 11 ka kandidata sa Miss Iloilo 2020 kag pagasundan sang barangay kag school-based tribes nga magapakigbahin sa Dagyang sa Calle Real kag Dinagyang 360 degrees.
May yara man sang LED screen nga igapahamtang agud nga makita gid sang tumalan-aw ang nagakatabo sa programa.
Sa performance sa apat ka judging areas, tungaon ang mga tribu kag pagkatapos sang performance, may yara sang 10-minute fireworks display.
