TIGBAUAN, ILOILO – Lunsay kalain sang buot ang ginalantaw nga motibo sang pulis sa separado nga inisidente sang paghikog-patay sang duha ka mga babaye nga menor de edad sa Tigbauan, Iloilo kahapon.
Sa interview sang Bombo Radyo kay Police Major Rolando Araño, hepe sang Tigbauan Municipal Police Station, iya ginpahayag nga sa una nga insidente, 16-anyos nga dalagita ang nasapwan nga nagabitay sa balayan sang ila balay sa Brgy. Supa, Tigbauan kag nakit-an ang “suicide note” nga nakabutang sa pulungkuan sa diin gintu-ad sini nga “linong pa ang kalibutan kang wala ako”.
Suno kay Araño, antes pa man natabo ang paghikog sang dalagita, naakigan ini sang iya nga tiya bangud ginpasingbangdan siya nga naggabot sang kuryente.
Sa ika-duha nga insidente, isa man ka 16-anyos nga dalagita ang naghikog sa Brgy. 8 Poblacion.
Pahayag ni Araño, antes ang paghikog sang dalagita, nag message pa ini sa iloy sang iya nga nobyo sa diin iya ginpahayag nga “Barato lungon, attend lang kamo. Ginasigurado ko nga matawhay ang tanan kun madula ko”.
Wala man suno sa pulis nag-away ang dalagita kag ang iya nga nobyo apang isa ka adlaw antes ini maghikog, ginsaway siya sang iya nga amay bangud nakita sini nga nagahigda ang dalagita sa paa sang iya nobyo sa ila nga balay.
Dugang pa ni Araño, matapos nga ginsaway siya sang iya amay, naghibubun-ot ini sa iya nga nobyo nga daw kaangay nga naglain ang iya buot.
Apang wala man nagdumdom ang iya nobyo nga malab-ot sa punto nga mahikog gid ang dalagita.
