ILOILO CITY- May inisyal na nga identity ang kalansay sang isa ka tawo nga nakutkutan sa Brgy Bunca, Barotac Nuevo, Iloilo.
Sa interview sang Bombo Radyo kay Police Major Rowena Hubero, hepe sang Barotac Nuevo Municipal Police Station, iya ginpahayag nga nakapakig-angot sila sa posible pamilya sa Himamaylan, Negros Occidental sang amo nga kalansay.
Suno kay Hubero, ang amo nga pamilya ang naga-claim nga may yara sila sang himata nga na-missing humalin pa sang 2015.
Ginpahayag niya nga sang nakit-an sang mga ini ang narekober nga mga panapton nga pula nga t-shirt kag short nga stripes, positibo nila nga na-identify nga ginapanag-iyahan ini ni Rodolfo Sardon, residente sang Barangay 3, Himamaylan, Negros Occidental.
Dugang pa niya, ginkumpirma sang pamilya nga nagatrabaho sadto si Sardon sa isa ka baligyaan sang hollowblocks nga ginapanag-iyahan ni Danilo Sumande.
Nahibaluan nga nasapwan ang kalansay samtang nagakutkut sang haligi para sa ginapaubra nga garahe nga ginapanag-iyahan ni Sumande.
Sa subong, padayon pa ang validation kag confirmation agud masigurado ang identity sang kalansay kag ma-claim na sang pamilya.
