Ginapreparar na sang Land Transportation Office Region 6 ang mas hugot nga pagpapatuman sang “Anti-Sardinas” policy batok sa ‘overloading’ sang mga pampasahero nga salakyan.
Sa interview sang Bombo Radyo kay Atty. Gaudioso Geduspan II, direktor sang LTO Region 6, ginpahayag sini nga pwede na nila ma-implementar ang polisiya, apang ginahatagan pa nila sang tion agud makalunsar sang insakto ukon nagakaigu nga ‘information campaign’, ilabi na subong nga nagbukas na ang klase.
Ginsiling pa ni Atty. Geduspan nga ginaprioridad man subong sang ahensya ang “passenger control and convenience” kag ginapanindugan nga indi dapat makompromiso ang kaluwasan sang mga pasahero.
Ang ini nga kampanya kabahin sang direktiba halin kay Presidente Ferdinand R. Marcos Jr. kag DOTr Secretary Vince B. Dizon, nga nagapati nga kinahanglan may kasiguruhan ang kaluwasan kag ‘convenience’ sang mga pasahero.
Sa pagpanguna ni Acting Assistant Secretary Atty. Greg G. Pua Jr., mas ginpabaskog sang LTO ang pagpahamtang sang “Anti-Sardinas Policy” paagi sa deployment sang mga personahe halin sa Law Enforcement Service kag mga regional offices.
Nagapadayon ang mga inspeksyon kag operasyon sa mga dalanon kag terminal sa bug-os nga pungsod, agud dakpon ang mga pampasahero nga salakyan nga nagalapas sa ginasugo nga kapasidad.
