Nagpakita sa publiko si US Vice President Kamala Harris sa labing-una nga tion halin sang gin-endorso ini ni President Joe Biden nga mangin kandidato sang Democratic Party para sa 2024 presidential elections.
Ini kasunod man sang pagkumpirma sang 81-anyos nga Democrat leader nga indi na ini magpadayon sa presidential race subong nga tuig kag suportado sini si Harris nga amo ang magatiglawas sang ila partido para magbunggo kay anay President Donald Trump nga amo naman ang kandidato sang Republicans.
Sa iya nga speech sa White House agud pasidunggan ang college athletes, gindayaw ni Harris si Biden kag ang mga hinimuan sini sa sulod sang iya apat ka tuig nga termino.
“Joe Biden’s legacy over the last three years is unmatched in modern history,” pahayag sini. “Every day, our president, Joe Biden, fights for the American people and we are deeply, deeply grateful for his service to our nation.”
Wala pa ginpakilala ni Harris ang iya kaugalingon bilang nagapanguna nga Democratic presidential candidate sa pagka-presidente.
Ang pinakaulihi nga nag-endorso sa iya amo mismo si U.S. Representative Nancy Pelosi, anay House speaker kag isa ka influential voice sa Democratic Party.
Sunod man nga nagbisita ang bise-presidente sa Delaware agud bisitahon ang Biden campaign headquarters nga amo subong ang nagaserbe nga iya main campaign office.
Ang iban pa nga ginalantaw nga challengers sa posible nga kandidatura ni Harris amo sanday Michigan Governor Gretchen Whitmer, California Governor Gavin Newsom kag Kentucky Governor Andy Beshear.
