Gin-aprubahan sang Kamara ang hagna nga nagaduso nga buhinan ang premium contribution rate sa Philippine Health Insurance Corporation (PhilHealth).
Halin sa singko porsyento, ginduso nga ipanubo ini sa 3.5%.
Naaprubahan ini nga House Bill 11357 ukon ang An Act Strengthening the Philippine Healthcare System to Achieve Efficiency and Equity and to Improve Public Health Emergency Preparedness paagi sa viva voce sa second reading.
Isa ini ka prayoridad nga hagna sa idalom sang Legislative Executive Development Advisory Council (LEDAC) kag amo ang naga-amyendar sang Republic Act No. 11223 ukon Universal Health Care (UHC) Act.
Sa idalom sini nga bag-o nga hagna, ang 3.5% PhilHealth premium contribution rates sang miyembro ang iga-adjust base sa actuarial studies nga iga-evaluate sang non-government, impartial, kag credible independent body.
Ang adjustment sa premium contribution ang mangin subject pa sa approval sang Kongreso kun iga-deliberate na ang proposed national budget.
Sa sini man nga hagna nakasaad nga indi na required nga magbayad sang PhilHealth contribution ang Overseas Filipino Workers (OFWs) bangud 50% sini ang sabton sang ila nga employer samtang ang 50% naman ang pagabayaran sang Philippine government.
Nagpasalamat naman si Department of Health (DOH) Sec. Ted Herbosa sa Kamara sa pag-approve sa amo nga hagna kag nagalaum nga dalayon na ini nga mapasar bilang layi sa labing-madali nga tion.
Matandaan nga nag-apruba na ang Senado sang kaangay nga bersyon sang hagna ukon ang Senate Bill 2620 sa third and final reading sang nagligad pa nga Agusto 2024.
