Kamara ginpasalig nga may oras pa para ipasar ang laye sa pagpaiway sang brgy. election

ILOILO CITY – Wala pa naistoryahan sang mga miyembro sang Kongreso ang pagpasar sang laye agud indi madayon ang barangay elections.
Sa interview sang Bombo Radyo kay Iloilo 5th District Rep. Raul Tupas, ginpahayag sini nga masako pa subong ang mga miyembro sang House of
Representatives sa Western and Eastern nautical highway port inspection.
Suno kay Tupas, wala pa nakamuno si House Speaker Pantaleon Alvarez kaangot sa nasambit nga isyu.
Apang ginpasigurado sang mamalidha nga may bastante pa nga oras ang Kamara sa ti-on nga magmando ni Presidente Rodrigo Duterte nga magpasar sang laye agud ipaiway anay ang pinili-ay sa barangay.
Sa Mayo 2 suno kay Tupas, liwat nga magabalik sa session ang Kamara kag tuman ka bastante ang tiyempo agud magpasar ang laye.
Nahibaluan nga luyag ipaiway sang Presidente ang pagpatuman sang barangay election bangud sa ginapahayag 40 percent sang mga punong barangay sa Pilipinas ang involve sa iligal nga droga.