ILOILO CITY- Handa na ang House of Representatives para sa ikatatlo nga State of the Nation Address ni Presidente Ferdinand Marcos Jr. sa Hulyo 22.
Suno kay House Speaker Martin Romualdez, mabatyagan na sang tanan ang kalangkag nga mabatian kag maapresyar ang mga accomplishments sang Marcos administration.
Pahayag ni Romualdez, ini nga importante nga address ang magaplastar sang komprehensibo nga laragway sang progreso sang administrasyon kag magahanda sang ila iduso kag ibalay nga mga legislative initiatives sa palaabuton nga magahurma sang nasyon.
May kaangtanan diri, nagalaum si House Committee on Ways and Means Chairperson and Albay 2nd District Representative Joey Salceda nga ianunsyo sang Presidente ang big-ticket projects nga buligan nga pondohan sang Maharlika Investment Corp, amo man ang yara sa idalom sang Private Public Partnership.
Suno naman kay KABAYAN Party List Representative Ron Salo, nagalaum ini nga ma-highlight sang president ang proteksyon sang kinamatarung kag promosyon sang kaayuhan sang mga Overseas Filipino Workers.
Iya man ginpanawagan ang gilayon nga pagpasar sang Magna Carta of Filipino Seafarers.
