Gin-athag sang isa ka opisyal sang House of Representatives nga wala ginbisita sang sin-o man nga hairdresser si iya detention facility si Katherine Cassandra Li Ong, ang Whirlwind Corporation stakeholder nga nag-atubang sa Senado kahapon.
Suno sa report halin kay House Sergeant-at-Arms retired police Maj. Gen. Napoleon Taas, nga gin-relay man ni Secretary General Reginald Velasco, ang legal team kag abyan lang ni Ong ang nagbisita sa iya samtang detained sa kamara.
Suno kay Taas, ginatugutan sang House ang personal care services pareho sang haircuts, apang wala nag-request si Ong.
Nagtuhaw ang mga pamangkot tuhoy sa buhok ni Ong sang naobserbahan sang mga netizens ang iya itsura samtang yara sa Senate hearing.
Makit-an nga may color kag nagkulong ang buhok sini.
Apang suno kay Taas, pareho lang ang duag sang buhok ni Ong sang gindala siya sa kamara.
Dugang pa niya, available man ang logbook kag closed circuit television camera (CCTV) footage para sa publiko agud i- check ang mga bisita ni Ong.
Nahibaluan nga si Ong ang ginpatambong sa Senate hearing tuhoy sa illegal activities sa Pogo hub sa Bamban, Tarlac, nga naangot kay dismissed Bamban mayor Alice Guo.
