Nagmando ang Korte Suprema sa Kamara kag Senado nga magpasa sang mga dokumento kag impormasyon nga naangot sa impeachment proceedings batok kay Vice President Sara Duterte.
Ang tikang nga ini sang Supreme Court ang naangot sa separado nga mga petisyon sang bise-presidente kag sang Kingdom of Jesus Christ (KOJC) lawyer nga si Atty. Israelito Torreon nga naga-kwestyon sang legalidad sang proceedings.
Lakip sa luyag mahibaluan sang korte amo ang kun sin-o ang nagpreparar sang draft articles; kun napalibot bala ang draft kag ang ebidensya sa tanan nga myembro sang Kamara; kag kun nalakip bala ang Articles sa Order of Business para sa plenary consideration.
Ginapamangkot man sang High Court kun san-o gin-file ang nauna nga tatlo ka impeachment complaints kag ang ila status, kag kun pila ka adlaw ang naglapse halin sa endorsement pakadto sa pagpasa sa Office of House Speaker kag pagkalakip sa Order of Business.
Dapat man ipaathag kun may diskresyon bala ang House Secretary General kun san-o sini ipasa ang complaints sa Office of the House Speaker, kag kun bala, mahimo ini makapamalibad.
Ginkumpirma naman sang Kamara nga nabaton nila ang order kag maga-comply sila sa Korte Suprema.
Sa pihak nga bahin, nagpaguwa naman sang statement si Atty. Regie Tongol, spokesperson sang Senate Impeachment Court, nga ang tikang sang Korte Suprema ang kaangay man sa tikang sang Senado sang Hunyo nga i-remand ukon ibalik sa Kamara ang Articles of Impeachment bangud sa mga pamangkot nga naangot sa constitutionality.
