ILOILO CITY – Duha ka butang ang dapat nga dumdumon sang publiko subong nga Easter Sunday ukon adlaw sang pagkabanhaw ni Hesus.
Sa pagpaathag sa Bombo Radyo ni Msgr. Meliton Oso, Director sang Jaro Archdiocesan Social Action Center (JASAC), ang Easter Sunday ang palatandaan sang kamatayon kag pagkabanhaw.
Suno kay Msgr. Oso, nag-antos sa kasakit, nagpalansang sa krus, napatay apang nabanhaw si Hesus sa rason nga ginadumdum ang Semana Santa.
Ang kasakit kag ang kamatayon ni Hesus ang makabig nga temporaryo lamang kag kasubong sa aton nga pagpangabuhi sa adlaw-adlaw suno kay Msgr. Oso, ang mga pagpanghangkat kag kasakit nga aton nabatyagan ang makabig nga temporaryo lamang.
Bilang tawo, indi man malikawan suno sa iya nga makabatyag sang kasakit, kahadlok kag madali nga mahaylo apang ang malahalon suno kay Msgr. Oso amo nga wala ginadula ang paglaum kag padayon sa pagpangabuhi agud nga masolbar ang mga problema.
Ginhalimbawa pa sang natungdan ang kontrobersiya nga ginkaulamiran sang Simbahan Katoliko tuhoy sa ‘sex crimes’ sang iban nga mga pari.
Sa pihak sini, nagapabilin nga mabakod ang Simbahan Katoliko para sa mga deboto nga padayon nga nagapati sa Ginuo.
