ILOILO – Daku nga kadulaan sa showbiz industry ang kamatayon sang beterano nga aktor nga si Eddie Garcia.
Sa interview sang Bombo Radyo kay Elvert Bañares, ilonggo nga director kag cinematographer, iya ginpahayag nga makalima niya ka beses nga nakita kag nakaupod ang aktor kag direktor nga si Garcia.
Ginpahayag ni Bañares nga sa patag sang showbiz, si Garcia ang makabig nga maayo nga ehemplo sa mga ulihing-tubo.
Ini bangud nga suno kay Bañares, si Garcia ang sahi sang tawo nga talentado, maambong, mapainubuson, disiplinado kag may maayo nga paminatasan.
Sa pagkamatuod suno sa ilonggo nga direktor, gawi na sang 90 anyos nga aktor nga temprano pa nga naga-abot sa set ukon sa venue sa tion nga may yara sang ‘taping’.
Bilang isa naman ka direktor, ginpahayag sang natungdan nga ginatapos gid gilayon ni Garcia ang ‘taping’ santo sa gintalana nga deadline.
Kun tani suno kay Bañares, ang natabo kay Garcia ang mangin pamukaw sa showbiz industry ilabi na sa patag sang film making nga mas mangin maid-id ilabi na sa tion sang ‘taping’.
