Ginklaro sang awtoridad nga wala sang foul play sa kamatayon sang Oscar-winning actor nga si Gene Hackman kag iya asawa nga si Miss Betsy Hackman.
Ini nga kumpirmasyon ang opisyal nga nagatakop sang masobra isa ka semana nga espekulasyon kun ano ang natabo sa duha antes sila nasapwan nga patay na kaupod sa ila nga ido sa ila balay sa New Mexico, USA.
Suno kay Heather Jarrell, ang chief medical examiner sa New Mexico Office of the Medical Investigator, napatay ang 95-anyos nga Hollywood actor bangud sa hypertensive and atherosclerotic cardiovascular disease kag ginapanan-aw nga daku nga factor diri ang Alzheimer’s disease.
Ginpahayag nga ang rason namna sa kamatayon sang 65-anyos nga misis amo ang hantavirus, pulmonary syndrome nga daw isa ka flu-like disease nga mahimo magresulta sa kabudlay sa pagginhawa kag cardiac ukon heart failure kag lung failure.
“The cause of death for Mr. Gene Hackman, aged 95 years, is hypertensive and atherosclerotic cardiovascular disease, with Alzheimer’s disease as a significant contributory factor,”suno kay Jarrell. “The cause of death for Miss Betsy Hackman, aged 65 years, is hantavirus, pulmonary syndrome. The manner of death is natural.”
Nagguwa man sa test nga wala sang sign of trauma sa lawas sang duha, kag wala man sang indikasyon nga ginhiluan sila apisar nga ini ang una nagguwa sa espekulasyon sang publiko.
Base sa otoridad, posible nga Pebrero 11 pa napatay ang misis, samtang Pebrero 18 naman napatay ang actor kun basehan ang iya last activities sa balay.
Magluwas sa napatay nga mag-asawa, nasapwan man nga patay ang ila nga ido sa bathroom, samtang may duha ka iban pa nga healthy dogs nga yara sa balay.
Nahibaluan nga bantog si Hackman nga duha ka beses nakadaog sa Academy Awards ukon Oscars. Ini ang amo ang Best Actor award sa iya papel sa 1971 thriller nga The French Connection, kag award man sa best supporting actor sa Western film nga Unforgiven sang 1992.
Natungdan niya ang masobra 100 ka mga papel sa mga pelikula antes siya nag-retiro sa industriya sa Hollywood.
