ILOILO – Mas ginpabaskog sang Department of Health ang kampanya batok sa Polio bilang pagsunod sa mandu ni Secretary Francisco Duque.
Nahibaluan nga nagpaguwa sang mando si Duque nga pabaskugon ang kampanya batok sa Polio matapos nga gindeklarar ang Polio outbreak sa pungsod bangud sa duha ka kaso sang nasambit nga balatian nga na record sa Lanao Del Sur kag Laguna.
Sa interview sang Bombo Radyo kay Mary Jane Juanico, Medical Officer III sang Department of Health, iya ginpahayag nga may yara na sang nahamtang nga mga Local Health Unit sa tagsa ka mga Local Government Unit agud maghatag sang vaccination.
Suno kay Juanico, wala sang dapat kahangw-an ang mga ginikanan bangud nga ang bakuna nga ginahatag sang ahensya ang nag-agi sa tul-id nga pagpanalawsaw, ginagamit sa nagkalain-lain nga pungsod kag napamatud-an nga epektibo.
Dugang sang natungdan, mataas ang posibilidad nga maka-angkon sang Polio ang mga kabataan nga naga-edad 15 anyos panubo gani importante nga mabakunahan sila.
Nagpanugyan si Juanico nga posible makuha ang Polio virus sa mga kontaminado nga pagkaon kag tubig.
Nagakadapat nga ipabilin ang katinlo sa panimalay kag amo man sa pagginawi.
