Nagapanguna ang Barangay Calaparan, Arevalo kag ang Barangay Caingin, Lapaz sa may pinakamataas nga kaso sang dengue sa syudad sang Iloilo.
Base ini sa Enero, 2021 tubtub Hulyo 31, 2021 nga report sang Iloilo City Health Office.
Lunsay may tag-11 ka kaso ang amo nga mga barangay out of 264 cases nga narekord sa syudad.
May kaangtanan diri, nagmandu na si Iloilo City Mayor Jerry Treñas sa mga punong barangay sa syudad nga i-monitor gid sang maayo ang ila tagsa ka lugar agud nga maguba ang breeding places sang lamok.
Sa bahin sang General Services Office (GSO), ginpahayag nga handa naman ang mga personnel agud nga makuha ang mga daan nga goma sang salakyan sa mga barangay pati na ang mga lata kag wala nakolekta nga mga basura.
Sa interview sang Bombo Radyo kay Engineer Niel Ravena, pinuno sang GSO, iya ginpahayag nga may yara sang 300 ka sweepers kag lima ka truck nga amo ang magabulig sa mga barangay sa mga distrito sa syudad para sa clean-up sa maabot nga Sabado.
Sa regional level, ginpahayag naman sang Department of Health nga may yara na sang 1,204 cases sang dengue sa bilog nga Western Visayas halin sang Enero tubtub sa Hulyo 31 subong nga tuig.
Sa interview sang Bombo Radyo kay Dr. Carl Diesca, focal person sang DOH Region VI angot sa kaso sang dengue, iya ginpahayag nga nagapanguna diri sa highest number of cases ang Negros Occidental kag Iloilo Province nga lunsay may 264 cases.
Expected na ini suno sa natungdan ilabi na sang nag-umpisa ang tag-ululan.##
