ILOILO CITY – Nagapadayon ang pagpaninlo sa palibot sang syudad sang Iloilo sa pihak sang pagtaas sang kaso sang Dengue Hemorrhagic Fever.
Sa interview sang Bombo Radyo kay Iloilo City Councilor Allan Zaldivar, chairman sang Committee on Health sa konseho, iya ginpahayag nga ang sentro sang pagpaninlo subong nga Sabado amo ang Brgy. Balantang sa distrito sang Jaro.
Suno kay Zaldivar, indi mag-untat ang kampanya sang Iloilo City Government tubtub nga indi matapna ang pagduging sang nasambit nga balati-an.
Ginpahayag ni Zaldivar nga ang mga barangay nga may yara sang pinakamadamu nga kaso sang Dengue amo ang ginatutukan sa pagpaninlo.
Kadungan sini, ginpahayag sang natungdan nga indi lang ang mga critical barangay ang dapat nga ginatulu-an kundi lakip ang tanan nga barangay.
Magluwas sa pagpaninlo nga updan sang nagkalain-lain nga volunteer groups, may yara man sang tatlo ka teams gikan sa City Health Office nga amo ang magapatigayon sang misting.
Samtang, ginpanugyan ni Zaldivar nga magpakunsulta gilayon sa barangay health centers kun may yara sang ginabatyag nga hilanat ukon balati-an.
Kun magpositibo sa Dengue, ginpahayag ni Zaldivar nga mahimo nga magpadulong sa hydration center sa La Paz Maternity Clinic agud nga magpa Dengue test.
Ginpahayag sang natungdan nga ang bulong kag medical facilities sa hydration center ang libre sa mga pumuluyo sang syudad sang Iloilo.
