Ginlunsar sang Land Transportation Office Region-6 ang kampanya nga ”Oplan Biyaheng Ayos: Undas 2025” bilang preparasyon sa ginapaabot nga pagdamo sang pasahero sa Iloilo sa tion sang Undas.
Sa interview sang Bombo Radyo kay Atty. Gaudioso Geduspan, Regional Director sang LTO Region-6, suno sa iya, ang operasyon sang kampanya magasugod halin Oktubre 20 tubtob Nobyembre 4, 2025, kag magatutok sa mga terminal sa Mohon, People’s, Ungka, kag Tagbac.
Ginpahayag ni Geduspan nga kabahin sang inisyatibo ang pagpatuman sang istrikto nga seguridad ilabi na sa peak nga adlaw sang Undas.
Ginahingyo man sang LTO ang kooperasyon sang iban pa nga ahensiya para sa mas epektibo nga pagmonitor sang mga pampasahero nga salakyan.
Lakip sa mga ginatutukan amo ang pagsunod sang mga Public Utility Vehicles sa mga regulasyon, kag ang paglikaw sa aksidente paagi sa maayo nga sistema sang transportasyon.
Ginpanindugan sang LTO nga ang kampanya nagatuyo nga masiguro ang kasulhay kag kaluwasan sang biyahe sang publiko sa tion sang pagpanumbalik sang pista minatay.
