GUIMARAS – Labi pa nga gina-hugot sang mga opisyal sang Nueva Valencia, Guimaras ang kampanya batok sa pagpanigarilyo sa pampubliko nga lugar.
Sa interview sang Bombo Radyo kay Pastor Lief Bonifacio Gimeno, project coordinator sa Anti-smoking campaign sa nasambit nga banwa, iya ginpahayag nga paagi sa pulong-pulong sa barangay kag mapisan nga pagpangtapik sang Information Education Communication (IEC) materials, mas nahangpan sang mga pumuluyo ang ila responsibilidad sa pag-kooperar sa otoridad may kaangtanan sa amo nga anti-smoking ordinance.
Nahibaluan nga sa probinsya sang Guimaras, ang banwa sang Nueva Valencia kag Buenavista lang ang may amo nga ordinansa kag nagapanagtag sang citation tickets.
Liwat nga ginpahanumdom sang natungdan sa publiko nga lakip sa ginadumilian nga mga lugar sa pagpanigarilyo amo ang children’s playground, terminal sang jeep, motorsiklo, tricycle kag iban pa, plaza, eskwelahan, kag iban pa.
Suno kay Gimeno, ginakalipay nila nga sa subong, wala na sang mga kabataan nga nagakadakpan nga nagalapas sa amo nga ordinansa bangud ginatuman man sang mga tag-iya sang tiangge ang mandu nga indi sila mahimo makabaligya sang ‘per stick’ nga sigarilyo ilabi na sa mga menor de edad.
Paga-multahan sang P1,000 ang tag-iya sang tiangge nga madakpan sa first offense.
Samtang, ang madakpan naman nga nagapanigarilyo sa pampubliko nga mga lugar ang paga-multahan sang:
P500 – First Offense
P1,000 – Second Offense
P 2,000 – Third Offense
P 2,000 kag/ukon pagka-preso sang indi magsobra sa lima ka adlaw — kun maglapaw pa sa third offense.
