Ginpahayag sang kampo ni anay Negros Oriental Congressman Arnolfo “Arnie” Teves Jr. nga wala ini sang ginabaton nga special treatment samtang yara sa sulod sang New Bilibid Prison (NBP) sa Muntinlupa City.
Suno sa iya legal nga abogado nga si Atty. Ferdinand Topacio, nagpasugot sila nga sundon ang tanan nga regulasyon para sa mga preso, lakip na ang pag-upod ni Teves sa iban nga mga inmates sa isa ka selda.
Ini nga desisyon ang ginpatuman agud malikawan ang posible nga mga pagbatikos kay NBI Director Jaime Santiago nga una na nagsiling sa isa ka press conference nga temporaryo nga pagapresohon si Teves nga naga-isahanon sa Building 14 sang Bilibid.
Gin-athag man ni Attty. Topacio nga pareho lang sa iban nga mga preso si Teves, kun sa diin may yara man ini sa isa ka 10 square meter nga selda upod sa iban nga mga inmates.
Ang selda ang may yara sang bunk bed, isa ka kasilyas, kag gamay nga electric fan.
Madumduman nga na-detain kag napatuman ang deportasyon ni Teves pabalik sa Pilipinas sang Huwebes matapos siya liwat nga madakpan sang mga otoridad sa Timor-Leste, kun sa diin siya nagapangayo sang asylum.
Pag-abot niya sa Pilipinas, gindala siya sa NBI headquarters sa Manila kag ginpaidalom sa booking procedure kag medical examination.
Sang hapon sang Biernes, ginsaylo si Teves sa Building 14 sang Bilibid.
Gina-atubang subong ni Teves ang madamo nga kaso sa Pilipinas, lakip na ang isyu sang Pamplona massacre kun sa diin siya ang ginatudlo nga utok sa brutal nga pagpatay kay anay Negros Oriental Governor Roel Degamo kag siyam pa ka mga indibidwal.
