Nagapanawagan ang kampo ni anay Presidente Rodrigo Duterte sa administrasyon ni President Ferdinand Marcos Jr. nga pahanugotan siya nga makapauli sa Pilipinas kun igahatag sang International Criminal Court (ICC) ang ila ginapangayo nga interim release.
Suno kay Atty. Nicholas Kaufman, abogado ni Duterte, ang padayon nga pagluya sang kondisyon sang anay Presidente samtang ginapreso sa ICC ang nagaapekto sa iya abilidad sa paghatag sang insakto nga mando kag ebidensya sa iya depensa.
Sa ginpagwa nga anunsyo sang ICC kagab-i, Setyembre 8, gin-postpone ang confirmation of charges hearing batok kay Duterte, nga kuntani naka-schedule sa Setyembre 23.
Ini nga desisyon nag-abot matapos ginpahayag sang kampo ni Duterte nga indi na siya “fit to stand trial” bangud sang iya kondisyon.
Sa pihak sini, dismayado naman ang pamilya sang mga ginapahayag nga biktima sang drug war sa idalom sang Duterte administration.
Para sa ila, ini nga desisyon sang ICC isa ka kabudlayan nga tikang sa pag-angkon sang hustisya.
