𝗜𝗟𝗢𝗜𝗟𝗢 – Nagpatigayon sang marathon hearing ang Sandiganbayan Fourth Division may kaangtanan sa kaso kriminal nga ginpasaka batok kanday former Capiz Governor Esteban Evan Contreras, former Provincial Administrator Edwin Monares kag Roxas Memorial Provincial Hospital chief Edmarie Tormon.
Una na nga ginhingyo sang mga akusado nga ibasura ang kaso, apang sa apat ka pahina nga resolution sang anti-graft court, ginpapag-on ang kaso nga ginpasaka sang Nobyembre 25, 2021 nanday incumbent Vice Gov. Jaime Magbanua kag sang mga myembro sang Sangguniang Panlalawigan.
Sa interview sang Bombo Radyo kay Atty. Melanie Madela, executive clerk of court II sang Sandiganbayan Fourth Division, iya ginpahayag nga sanday Contreras kag Tormon ang nagapangatubang sang isa ka count sa paglapas sang Government Procurement Reform Law (RA 9184) bangud sa ginapahayag irregularidad sa pagbakal sang provincial government sang medical supplies sang 2020 sa tion sang COVID-19 pandemic.
Suno kay Madela, nakitaan sang prosecutors sang ebidensya sa ‘unlawful splitting of contracts’ sa pagbakal sang medical supplies pinaagi sa small-value procurement.
May yara naman sang lima ka mga witnesses sa kaso, apang wala ini ginpangalanan sang Sandiganbayan.
Gintawag naman sang kampo ni Contreras nga political harassment ang ginhimo sa ila nanday Monares kag Tormon.
Sa interview sang Bombo Radyo kay Atty. Kaiser Cordero, legal counsel ni Contreras, iya ginpahayag nga ginpanindugan sang mga akusado nga nalapas ang ila constitutional right para sa ‘speedy disposition of cases’ bangud naglawig sang 28 ka bulan ang preliminary investigation sa diin wala ang mga ini mahatagan sang kahigayunan nga makaangkon sang maayo nga depensa.
Apang suno naman sa Sandiganbayan, napaslawan ang kampo ni Contreras nga mapamatud-an nga may error sa ruling nga amo kuntani ang basehan sa re-examination sang arguments.
