Ginsiling sang abogado ni anay President Rodrigo Duterte nga wala na sila nakibot sa mga ginpang-sumite nga ebidensya sang International Criminal Court (ICC) angot sa kaso batok sa anay Presidente.
Suno kay Atty. Nicholas Kaufman, apisar indi niya ibuyagyag ang reaksyon ni Duterte ukon ang estratehiya sang ila kampo, ginahimo nila ang maid-id nga pag-review sang masobra 2,300 ka dokumento nga ginpresentar sang prosekusyon halin Hulyo 1 tubtob Hulyo 4.
Dugang pa ni Kaufman nga may siyam ka eksperto ang ila legal team nga nakatutok sa preparasyon para sa confirmation of charges hearing nga natalana sa Setyembre sini nga tuig.
Sa pihak nga bahin, sa bag-o nga dokumento nga ginpagwa sang Hulyo 10, ginpanindugan sang kampo ni Duterte nga wala sang hurisdiksyon ang ICC sa nasambit nga kaso, nga nagatuhoy sa maduguon nga kampanya kontra droga sang anay alkalde pa ini sang Davao kag sang siya pa ang presidente sang Pilipinas.
Ginsambit man ni Kaufman ang suporta sang pila ka mga Pilipino sa panawagan nga ibalik si Duterte sa Pilipinas, lakip na ang resolusyon ni Senador Alan Peter Cayetano nga naga-rekomenda sang house arrest para sa anay presidente.
Suno sa abogado, dapat kilatison si Duterte sa idalum sang sistema sang hustisya sang Pilipinas.
Sa bahin sang kahimtangan sang lawas ni Duterte, ginpahayag ni Kaufman nga yara sa maayo nga kondisyon ang anay presidente apisar sa iya edad kag halos apat ka bulan nga pagpabilin sa The Hague, Netherlands.
