Ginpahayag ni Atty. Nicholas Kaufman, lead legal counsel ni former President Rodrigo Roa Duterte, nga wala sang interes ang kampo sang anay presidente nga kuhaon nga abogado si anay Presidential Spokesperson Harry Roque.
Ginpagguwa ni Kaufman ang ini nga pahayag bangud sang pag-intra ni Roque sa ginapangatubang nga kaso ni Duterte may kaangtanan sa “crimes against humanity”.
Pahayag pa sang abogado, sa una nga adlaw pa lamang wala na sang interes kag plano ang Team Duterte nga kuhaon nga abogado si Roque.
Suno pa sa iya, ginapakita lamang ni Roque nga siya isa lang ka tawo nga may kapasidad nga magdepensa sa anay Presidente.
Ginklaro ni Kaufman nga mismo si Duterte ang nagsiling nga pauntaton na si Roque sa mga ginapanghimo sini nga pag-intra ukon pagsaw-saw sa iya ginapangatubang nga mga kaso sa ICC.
Ginhambalan man sang abogado si Roque nga untaton na ang pagpa-epal sa kaso kag magbalik na lamang sa Pilipinas para atubangon ang iya kaugalingon nga mga kaso.
