USA – Ginakonsiderar subong ang kampo ni Former United States President Donald Trump ang tanan nga options agud iapelar ang pamatbat sa iya nga guilty sa 34 ka counts sang pagpeke sang business records agud maimpluwensyahan ang resulta kag integridad sang 2016 elections.
Suno kay Bombo Rufino ‘Pinoy’ Gonzales, international correspondent sa Amerika, mismo ang abogado ni Trump nga si Atty. Will Scharf nga luyag nila nga mabaliskad ang maragtason nga desisyon sang 12 ka mga jurors sa New York.
Possible suno sa natungdan nga dal-on nila ang kaso ni Trump sa United States Supreme Court.
Ginpahayag sang abogado nga wala mahatagan sang nagakaigo nga hustisya ang anay president sa New York nga maathag suno sa iya nga balwarte sang mga Democrats.
Sandig sa unanimous nga desisyon sang 12 ka jurors, ginpeke ni Trump ang record agud nga matabunan ang $130,000 ukon P7.6-million nga hush money payment sa adult film star nga si Stormy Daniels agud maimpluwensyahan ang eleksyon.
Pat-od suno sa natungdan nga makaapekto ini sa mangin dalagan sang eleksyon sa Nobyembre 5 ilabi na nga si Trump amo ang presumptive Republican presidential nominee kag ginapanan-aw nga magabunggo kay United States President Joe Biden nga isa ka Republican.
Natalana naman nga sentensyahan si Trump sa Hulyo 11 subong nga tuig, nga apat ka adlaw antes ang 2024 Republican National Convention sa Milwaukee.
Nahibaluan nga magluwas sa kaso sini sa New York, may dugang pa gid nga mga kaso kriminal si Trump sa Washington, D.C., Georgia, kag Florida.
