ILOILO CITY- Wala sang matabo nga withdrawal sa presidential bid ni Senator Manny Pacquiao sa idalom sang Probinsiya Muna Development Initiative ukon Promdi nga isa sa political organizations sang MP3 alliance.
Ini baliskad sa mga naggwa nga huring-huring nga maga-slide down ini sa pagka-bise presidente.
Sa interview sang Bombo Radyo kay anay Iloilo City Councilor Plaridel Nava, Iloilo City Chairman sang Manny Pacquiao for President Movement, iya ginpahayag nga kun may plano si Pacquiao nga magpaiway, madugay na niya ini nga ginhimo.
Suno kay Nava nga yara subong sa Sarangani Province sa hometown ni Pacquiao,wala sila sang iban nga ginaistoryahan subong kundi ang pag-strategize sang pamaagi agud nga mapataas ang rating kag popularidad sini sa mga botante.
Pahayag pa ni Nava, wala sang political machinery ang fighting senator gani nagasalig lang ini sa mga parallel groups sa pagkampanya agud mapadamo pa ang mga indibidwal nga maga-pledge sang suporta sa presidential bid sang senador.
