Ginkwestyon sang kampo ni Kingdom of Jesus Christ leader Pastor Apollo Quiboloy ang motibo sang mga pribado nga indibidwal sa paghatag sang padya nga P10 million sa makatudlo sa ginapanaguan sini.
Suno kay Atty. Ferdinand Topacio, legal counsel ni Quiboloy, luyag nila nga mahibaluan kun ngaa indi luyag ni Interior Secretary Atty. Benjamin “Benhur” Abalos, Jr nga ipagwa sa publiko ang pangalan sang pribado nga indibidwal nga naghatag sang tuman ka dako nga padya sa makatudlo sa ginpanaguan sang self proclaimed son of God.
“May mga kwestyon lang po kami… kung [bakit] ayaw sabihin ni Secretary Abalos kung sino itong mga pribadong taong ito para malaman natin at makilatis natin ang kanilang motibo kung bakit itong si Pastor Quiboloy ay binibigyan nila ng napakalaking pabuya,” pahayag ni Atty. Topacio.
Ginpahayag ni Topacio nga kinahanglan sang mga Filipino nga mahibaluan ang mga bagay nga may yara sang public concern.
Kahapon, ginkumpirma ni Secrertary Abalos nga may mga abyan siya nga luyag magbulig agud madakpan gilayon si Quiboloy.
Magluwas kay Quiboloy, may yara man P1 million nga padya nga makatudlo sa mga ginapanaguan sang lima pa ka mga akusado nga kahimbon sini.
“Siguro naman makikita niya. Maybe he will see the error of his ways at bawiin niya ‘yan. Kunin na lang pondo ng gobyerno at ilagay sa lugar ‘yung amount,” dugang pa ni Topacio.
Una naman nga ginkwestyon ni Topacio kun ngaa wala naghalin sa intelligence funds sang gobyerno ang patong sa ulo ni Quiboloy.
“Anyare doon sa intelligence funds na talaga namang pinaglalaanan at pinag pupuhunan ng mga pabuya sa ganitong rewards.”
Sa pihak sini, ginakilala man ni Topacio ang gahom sang Department of the Interior and Local Government kag Philippine National Police nga magpatuman sang patong sa ulo sa mga subject sang warrants of arrest.
Lakip sa mga warrants of arrest nga gin-issue batok kay Quiboloy amo ang paglapas sa Republic Act 7610 ukon Special Protection of Children Against Abuse, Exploitation, and Discrimination Act kag Republic Act No. 9208 ukon Qualified Human Trafficking.
Gin-indict naman si Quiboloy sang federal grand jury sa United States District Court for the Central District of California bangud sa conspiracy sa pag-engage sa sex trafficking by force, fraud and coercion and sex trafficking of children; sex trafficking by force, fraud and coercion; conspiracy; kag bulk cash smuggling.
