Gin-athag sang kampo ni Vice President Leni Robredo nga indi ang bise presidente ang nagduso nga maghimo sila sang infomercial ni Presidente Duterte agud engganyuhon ang mga Filipino nga magpatublok sang COVID-19 vaccine.
Ini ang gin-athag ni Atty. Barry Gutierrez, spokesperson ni Robredo matapos ginpahayag ni Presidential Spokesman Atty. Harry Roque sa Talk to the Nation nga nagboluntaryo ang bise presidente nga magguwa sa vaccine ad kaupod si Duterte.
Suno sa abogado, nagabinutig lamang si Roque kag ang tawo nga masami nagabutig ang dapat indi na pagsaligan pa.
Matandaan nga si Senador Joel Villanueva ang nagpahayag nga maghimo sang vaccine ad kaupod sanday Duterte kag Robredo agud mapataas ang kumpiyansa sang publiko sa pagpabakuna.
