ILOILO CITY – Wala malingkang ang kampo ni Vice President Leni Robredo apisar nga ginpaboran sang Supreme Court (SC) ang hingyo nga recount ni anay Sen. Bongbong Marcos may kaangtanan sa electoral protest sini.
Sa interview sang Bombo Radyo Iloilo, ginpahayag ni Atty. Maria Bernadette Sardillo, abogado ni Vice President Robredo, kampante sila nga pagkatapos sang recount mapamatud-an nga si Robredo ang matuod nga nagdaog.
Nahibaluan nga ginbasura sang Korte Suprema ang pagkuwestyon ni Marcos sa integridad sang nagligad nga eleksyon apang ginpaboran ang manual recount sang mga balota gikan sa Iloilo, Negros Oriental kag Camarines Sur.
Para kay Sardillo, ang desisyon sang Supreme Court nga nagaserbe bilang Presidential Electoral Tribunal ang indikasyon nga lehitimo nga bise presidente si Robredo.
Nagalaum ang kampo sang Vice President nga pagkatapos sang recount, dalayon na nga mabasura ang election protest ni Marcos.
May pila na ka mga balota nga nabuksan sa iban nga electoral protest nga wala man sang kinalain ang numero sang mga boto nga gin-isip sang makina kag sa manual count.
Sa ti-on nga mabuksan ang mga balota, labi nga mapamatud-an suno kay Sardillo nga nagdaog si Robredo.
Apang wala pa sang timetable ang Presidential Electoral Tribunal kun san-o patigayunon ang recount kag ila pa ini nga athagon sa Korte Suprema.