Ginkumpirma sang kampo ni Vice President Sara Duterte nga indi ini magtambong sa conference sang National Bureau of Investigation (NBI) sa Oktubre 5.
Kaangot ini sang mga alegasyon sang anay police nga si Rodulfo Gracioso Jr.
Nahibaluan nga ginpangabay sang abogado ni Duterte sa NBI nga ihatag anay ang kopya sang affidavit ni Gracioso, dala na diri ang mga attachment kag ebidensya nga ginsumiter sini.
Suno sa kampo ni Duterte, kinahanglan nila sang nagakaigo nga oras agud mabusisi ang affidavit bag-o maghatag sang sabat.
Bangud diri, ginpangabay sang mga ini nga sayluhon ang conference sa Oktubre 8, 2026, alas-10 sang aga, kun mahatag nila gilayon ang mga dokumento.
Sa matandaan nga nagpahayag si Gracioso nga naghatod ini sang maleta nga naga-unod sang kwarta kanday Sara Duterte, anay President Rodrigo Duterte, kag Paolo “Pulong” Duterte.
Ginabanta nga masobra 2 bilyon pesos ang nahatod kay Duterte suno kay Gracioso.
Pahayag pa ni Duterte nga indi niya kilala si Gracioso kag wala ini makabaton sang kwarta halin kay Gracioso.
Padayon ang imbestigasyon sang NBI sa mga alegasyon kag plano sang mga ini nga kuhaan sang pahayag ang mga indibidwal nga nalakip sa mga akusasyon.
Samtang, ginpahayag sang kampo ni Lord Allan Velasco nga wala sang basehan ang mga alegasyon.
